ავსტრალიაში ჭადრაკი სპორტის რასისტულ სახეობად აღიარეს – კასპაროვის პასუხი ავსტრალიელებს
ავსტრალიის სამაუწყებლო კორპორაციის სიდნეის რადიოსადგურმა (ABC) ჭადრაკს სპორტის რასისტული სახეობა უწოდა.
კერძოდ, ABC-ის აზრით, რასიზმის გამოვლინებად შეიძლება ჩაითვალოს ის, რომ თამაშს თეთრი ფიგურები იწყებენ. ჭადრაკში მსოფლიოს მე-13 ჩემპიონმა გარი კასპაროვმა, რომელსაც ხშირად ყველა დროის საუკეთესო მოჭადრაკედ მოიხსენიებენ, ავსტრალიურ რადიოს Twitter-ის საშუალებით უპასუხა და ბრიყვები უწოდა.
“თუ ფიქრობთ, რომ ჭადრაკი რასისტული სპორტის სახეობაა, გო ითამაშეთ (გო- რთული სამაგიდო თამაში), სადაც თამაშს შავი ფიგურები იწყებენ. ჯობია ასე გააკეთოთ, ვიდრე ბრიყვებად გამოიყურებოდეთ“ – განაცხადა კასპაროვმა.
კასპაროვს ყოფილი ავსტრალიელი მოჭადრაკე ჯონ ადამსი გამოეხმაურა.
„სასიამოვნო სანახავია, რომ ჭადრაკში მსოფლიოს ექს-ჩემპიონმა ABC-ს საკადრისი პასუხი გასცა. ჯანსაღი აზრი ყოველთვის იმარჯვებს“ – განაცხადა ადამსმა.
შეგახსენებთ, რომ მაისის ბოლოდან აშშ-ის ათობით ქალაქში, ასევე ევროპასა და ავსტრალიაში ანტირასისტული საპროტესტო აქციები იმართება, რომელსაც მასობრივი არეულობები და პოლიციასთან შეტაკებები ახლავს.
