„იმის რისკი, რომ „ფაიზერი“ გაფუჭდება, არ არსებობს, „ფაიზერს“ ნოემბერში არ გასდის ვადა“
საქართველოს ჯანდაცვის მინისტრის, ეკატერინე ტიკარაძის განცხადებით, ინფორმაცია, რომ “ფაიზერის” ვაქცინას ნოემბერში ვადა გასდის, სიმართლეს არ შეესაბამება.შესაბამისად, როგორც მინისტრმა ჟურნალისტებთან საუბრისას აღნიშნა, რისკი იმისა, რომ „ფაიზერის“ ვაქცინები გაფუჭდეს, არ არსებობს.
“არანაირი რისკი იმის, რომ “ფაიზერი” გაფუჭდეს, არ არსებობს, “ფაიზერს” ნოემბერში არ გასდის ვადა“, – აღნიშნა ეკატერინე ტიკარაძემ.
ცნობისთვის, „ფაიზერის“ ვაქცინების ვადებთან დაკავშირებულ საფრთხეებზე ჟურნალისტებთან ინფექციური საავადმყოფოს დირექტორმა თენგიზ ცერცვაძემ ისაუბრა.
“ადრე, სანამ ვაქცინის შემოტანა დაგვიანდა და სხვათა შორის, ისიც დაგვიანდა ამ ანგაჟირებული ადამიანების გამო, რომ ჩინური ვაქცინა არ უნდოდათ, პირდაპირ გამოდიოდნენ და ამბობდნენ: “მე გავიკეთებ მხოლოდ “ფაიზერს“ და ამიტომ სახელმწიფომ დააგვიანა შემოტანა. ახლა, “ფაიზერი“ გვაქვს სწორედ ყველაზე მეტი. “ფაიზერი“ ფუჭდება, ვადა გაუსდის და რას შვრებით, ხალხო! ადამიანი “ფაიზერს“ გააფუჭებს?! მაშინ აჩუქებს სხვას, ვისაც ჩვენზე მეტი პასუხისმგებლობა აქვს და ვინც ამას გამოიყენებს. გვაქვს “სინოვაკი“, “სინოფარმი“ , “ასტრაზენეკა“, მივიღებთ “ჯონსონ და ჯონსონს“. მე ვერ გავიგე, მართლა საბოტაჟს აწყობთ?! რას აკეთებთ?!“, – განაცხადა ცერცვაძემ.
