დღეიდან “კურიერს” გიორგი სანაიას ვაჟი, სანდრო სანაია წაიყვანს
დღეიდან “რუსთავი 2”-ის ახალ სატელევიზიო სეზონში “კურიერს”, ძველ წამყვანებთან ერთად, ჟურნალისტ გიორგი სანაიას ვაჟი, სანდრო სანაია წაიყვანს.
„ძალიან დიდ პასუხისმგებლობას ვგრძნობ და იმედი მაქვს, რომ მეც მოვიპოვებ იმ ნდობას, რომელიც არსებობდა გიორგი სანაიას მიმართ”, – განაცხადა სანდრო სანაიამ.
შეახსენებთ, რომ სამაუწყებლო კომპანია “რუსთავი 2”-ის ჟურნალისტის გიორგი სანაია 2001 წლის 26 ივლისს საკუთარ სახლში გარდაცვლილი იპოვეს. გამოძიებამ მომხდარი ყოფით ნიადაგზე ჩადენილ მკვლელობად შეაფასა და პასუხისგებაში მისცა ვინმე გრიგოლ ხურცილავა, იგივე “გრიცკო”, თუმცა გამოძიების ეს ვერსია იმთავითვე ეჭვქვეშ დადგა.”ქართული ოცნების” ხელისუფლებაში მოსვლის შემდეგ, სანაიების ოჯახმა საქართველოს მთავარ პროკურატურას ხელახალი გამოძიების დაწყების თხოვნით მიმართა, თუმცა პროკურატურამ გამოძიება არ დაიწყო, მიზეზი კი ის გახდა, რომ საგამოძიებო უწყების განცხადებით, საჭიროა ახალი გარემოებების აღმოჩენა.