ის, რომ დასავლეთს ახლა ჰყავს სუსტი ლიდერები, რომლებსაც გადაწყვეტილებების მიღება არ შეუძლიათ, არანაირად არ ცვლის იმ მოცემულობას, რომ ჩვენ ამ ლიდერებზე სრულად ვართ დამოკიდებულები. ჩვენი მთავარი შეცდომა მდგომარეობს იმაში, რომ ფსონი ემოციური შანტაჟის პოლიტიკაზე და პერფორმანსის პოლიტიკაზე გავაკეთეთ, – ამის შესახებ უკრაინის პრეზიდენტის ადმინისტრაციის ყოფილი მრჩეველი ალექსეი არესტოვიჩი წერს.
„ის, რომ დასავლეთს ახლა ჰყავს სუსტი ლიდერები, რომლებსაც გადაწყვეტილებების მიღება არ შეუძლიათ, არანაირად არ ცვლის იმ მოცემულობას, რომ ჩვენ ამ ლიდერებზე სრულად ვართ დამოკიდებულები. ჩვენი მთავარი შეცდომა მდგომარეობს იმაში, რომ ფსონი ემოციური შანტაჟის პოლიტიკაზე და პერფორმანსის პოლიტიკაზე გავაკეთეთ. ამის ნაცვლად უნდა დავკავებულიყავით (2022 წლის 25 თებერვლიდან, 2019 წლიდან, 2014 წლიდან, 2008 წლიდან, 1991 წლიდან, 1648 წლიდან) საკუთარი პარტნიორული თვისებების გაუმჯობესებისა და რეალური სუვერენიტეტის მოპოვების პოლიტიკით. გმირობა უფრო ადვილია, ვიდრე რეალური სისტემური მშენებლობის განხორციელება. ნებისმიერმა სამხედრომ იცის, რომ გმირობა ჩავარდნების შედეგია. მთელი ჩვენი ისტორიის განმავლობაში ჩვენი მასობრივი გმირობის გათვალისწინებით, შეგიძლიათ შეაფასოთ, რამდენი ჩავარდნა გვქონდა.
ბუნებრივია, რომ პარტნიორებს, რომლებიც ინახავენ ჩვენს ეკონომიკასა და თავდაცვის ძალებს, აქვთ საკუთარი მიზნები საგარეო პოლიტიკაში და ისინი ცოტაოდენ გაკვირვებულები არიან ჩვენი პოზიციით, როდესაც ჩვენ მათ მიმართ ემოციური შანტაჟით ვართ დაკავებულები და ვითხოვთ, მათი მიზნები ჩვენი მიზნებით ჩაანაცვლონ – ამასთანავე, ვიპარავთ მათი გადასახადების გადამხდელების ფულებს.
1. ამერიკელები არ აპირებენ, საბოლოოდ დაამარცხონ რუსეთი (რათა ის სრულად ჩინეთის ქვეშ არ აღმოჩნდეს). ისინი ასევე არ დაუშვებენ, რომ ჩვენ საბოლოოდ დავმარცხდეთ.
2. ჩვენ ვითხოვთ სრულ გამარჯვებას და რუსეთის დაშლას – ამერიკის ფულით.
3. ჩვენ ვიპარავთ ამერიკის ფულს – ამერიკელები კი ითხოვენ, რომ ჩვენ ეს შევაჩეროთ.
აი, ეს არის იმის სქემა, რაც ახლა ხდება ვილნიუსში, ამ ომთან დაკავშირებით და ზოგადად – ჩვენს საგარეო პოლიტიკასთან დაკავშირებით, ხოლო საგარეო პოლიტიკა საშინაო პოლიტიკის გაგრძელებას წარმოადგენს. უკრაინისადმი ნატოს პირველ მოთხოვნად „კორუფციასთან ბრძოლა“ შემთხვევით არაა დასახელებული.
