“მიუღებელია ევროკავშირი ჰომოსექსუალთა ქორწინებას გვაძალებდეს – პოლონეთი
პოლონეთის იუსტიციის მინისტრი ზბიგნევ ზიობრო აცხადებს, რომ ის მიუღებლად თვლის კონსერვატიული ქვეყნისთვის ევროკავშირის მხრიდან ერთი და იმავე სქესის ადამიანთა ქორწინების დაშვების თავს მოხვევას. ზიობროს თქმით, წინააღმდეგ შემთხვევაში, პოლონეთმა შეიძლება ბლოკისგან ფინანსური დახმარება ვეღარ მიიღოს. ინფორმაციას სააგენტო “როიტერი” ავრცელებს.
“არსებობს რეალური რისკი, რომ აღმოვჩნდეთ სიტუაციაში, როცა ევროკავშირის კომისია ეფექტურად გვაიძულებს შემოვიღოთ ე.წ. ჰომოსექსუალთა ქორწინება, ბავშვების აყვანის უფლებით” – განაცხადა იუსტიციის მინისტრმა ორშაბათს გამართულ პრესკონფერენციაზე. ზიობრომ ასევე დასძინა: “ჩვენ ამას ვერცერთ შემთხვევაში ვერ დავთანხმდებით”.
ბრიუსელში მიმდინარე მოლაპარაკებაზე ევროკავშირის ზოგიერთი ლიდერი ითხოვდა, რომ წევრ ქვეყნებს გაეზიარებინათ საერთო დემოკრატიული ფასეულობები. წინააღმდეგ შემთხვევაში მასტიმულირებელი პაკეტით გათვალისწინებული დახმარება დაიბლოკებოდა.
პოლონეთის მემარჯვენე პოლიტიკური პარტიის (კანონის და სამართლის პარტია) ლიდერი – ანჯეი დუდა – გასულ კვირაში ქვეყნის პრეზიდენტად ხელმეორედ აირჩიეს. ამომრჩევლებისთვის მიცემული მისი ერთ-ერთი პოლიტიკური დაპირება იყო, არ დაეშვა ჰომოსექსუალი წყვილებისთვის შვილის აყვანის უფლება და სკოლებში აეკრძალა ჰომოსექსუალთა სამოქალაქო უფლებების შესახებ გაკვეთილების ჩატარება. პოლონეთის პრეზიდენტი ჰომოსექსუალთა უფლებების კომუნიზმზე უარეს “იდეოლოგიად” თვლის.
ჰომოსექსუალთა უფლებების დამცველი აქტივისტი ალისია სენკევიჩი ამბობს, რომ ანჯეი დუდა ლგბტ საზოგადოებას ისე ექცევა, როგორც სახელმწიფოს მტრებს. “ეს წარმოუდგენელია… კანონის უზენაესობის ერთგულება ნიშნავს ფუნდამენტური ადამიანის უფლებების ერთგულებას და მათ პატივისცემას” – აღნიშნავს სენკევიჩი.
„ამერიკის ხმა“
