გიორგი ზვიადაძის შვილის კომპანიამ ბოლო 11 წლის განმავლობაში 8 მილიონ 700 ათასი ლარის ღირებულების ტენდერებიდან მხოლოდ 2 მილიონ 200 ათასის სამუშაოები უხარისხოდ, ან არ შეასრულა (?!)
ჩემი შვილი ძალიან მძიმე ფინანსურ მდგომარეობაშია აღმოჩნდა და ხელისუფლებისგან ვთხოვე დახმარება, მაგრამ უარი მითხრეს - ზვიადაძე
სუს-ის ფაილებში აღმოჩენილი ინფორმაციის მიხედვით, მამის დახმარება უმცროს ზვიადაძეს იმ დროს სჭირდებოდა, როცა დამკვეთები უჩიოდნენ, ხან არასახარბიელოდ შესრულებული, ხან კი სულაც შეუსრულებელი სამუშაოების გამო.
ამონარიდი სუს-ის ფაილებიდან:”გიორგი ზვიადაძეს შვილმა, თორნიკემ აცნობა, რომ კახეთის რეგიონში აღებულ ობიექტებზე შეექმნა პრობლემები და სთხოვა თავისი კავშირების გამოყენებით დახმარება. გიორგი ზვიადაძემ დახმარება კახეთის გუბერნატორს, ირაკლი ქადაგიშვილს სთხოვა“. აღსანიშნავია, რომ პროტოპრესვიტერის შვილმა 2018-2019 წლებში, 9 ხელშეკრულება გააფორმა. ამ დრომდე, მხოლოდ 2 ტენდერია შესრულებული, თუმცა ისიც დარღვევებით.
თორნიკე ზვიადაძე ტენდერებს ასრულებდა საქართველოს სხვადასხვა რეგიონებში – გურჯაანი, ვანი, რუსთავი, თბილისი. შაბათის ფორმულა ესაუბრა თავად პროტოპრესვიტერს. გიორგი ზვიადაძე არ უარყოფს, რომ ნამდვილად ურეკავდა ხელისუფლების მაღალჩინოსნებს მისი შვილის პრობლემების მოსაგვარებლად.
“კი, ვურეკავდი ჩემი შვილი ძალიან მძიმე ფინანსურ მდგომარეობაშია აღმოჩნდა და ვთხოვე დახმარება, მაგრამ უარი მითხრეს”, – თქვა ზვიადაძემ.
ინფორმაციის გადამოწმება ვცადეთ ხარაგაულის ყოფილ მერთანაც. ნიკოლოზ თოფურიძემ დაგვიდასტურა, რომ მას სამინისტროდან დაურეკეს და სთხოვეს, რომ პროტოპრესვიტერის შვილის კომპანიისთვის ხელშეკრულების ვადა გაეხანგრძლივებინა.
ბოლო 11 წლის განმავლობაში გიორგი ზვიადაძის შვილის კომპანიამ 8 მილიონ 700 ათასი ლარის ტენდერებზე გააფორმა ხელშეკრულება. ამ დრომდე მან მხოლოდ 2 მილიონ 200 ათასი ლარის სამუშაოები უხარისხოდ, ან არ შეასრულა. მიუხედავად ამისა სახელმწიფო უწყებები პროტოპრესვიტერის შვილის კომპანიას თანხებს მაინც ურიცხავენ, უმეტეს შემთხვევაში კი 80%-მდე ავანსად. დარღვევების მიუხედავად, არცერთი მათგანი არ მიმართავს სასამართლოს, ბიუჯეტის მილიონობით ლარით დაზარალებისთვის.