საზოგადოება
ფოთი-გრიგოლეთი-ურეკის ტერიტორიაზე უჩვეულოდ დიდი რაოდენობის წყალმცენარეები დაფიქსირდა
გარემოს ეროვნული სააგენტოს ცნობით, შავი ზღვის სანაპიროს ფოთი-ურეკის მონაკვეთზე წყალმცენარეების რაოდენობის მატებასთან დაკავშირებით კვლევა მიმდინარეობს.
„ბოლო დღეებში საქართველოს შავი ზღვის სანაპირო ზოლში, კერძოდ ფოთი-გრიგოლეთი-ურეკის ტერიტორიაზე დაფიქსირდა უჩვეულოდ ჭარბი რაოდენობის წყალმცენარეები.
საქართველოს გარემოს დაცვისა და სოფლის მეურნეობის სამინისტროს გარემოს ეროვნული სააგენტოს სპეციალისტები ადგილზე გაეცნენ არსებულ ვითარებას.
აღებული იქნა სინჯები წყალმცენარეების ხარისხობრივი და რაოდენობრივი მაჩვენებლების, ასევე, წყლის ხარისხის ქიმიური და ბიოლოგიური კვლევის მიზნით“, – აცხადებენ უწყებაში.
სააგენტოს სპეციალისტების მიერ განხორციელებული კვლევების შედეგები უახლოეს დღეებში გახდება ცნობილი.
