საზოგადოება

„ჩვენ უკვე წითელ ხაზებს ვკვეთავთ, ყველაზე მძიმე 7 დღის განმავლობაში მაღალია სიკვდილიანობა“

დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, ქვეყანაში ეპიდემიოლოგიური ვითარება სერიოზულად არის გაუარესებული. მისივე თქმით, ამ ფონზე განსაკუთრებით მნიშვნელოვანია რეკომენდაციების დაცვა. გამყრელიძემ საკითხზე საუბრისას ყურადღება გაამახვილა დახურულ სივრცეში პირბადის ტარების აუცილებლობაზე.

„საშიშროება სერიოზულია, ამიტომ ყველამ უნდა გავითავისოთ, რომ ეპიდსიტუაცია მძიმდება, ჩვენ შევდივართ სერიოზულ ტალღაში. დღევანდელი და გუშინდელი მონაცემები იმეორებს იმას, რაც მაისის პიკში, ასევე ნოემბრის დასაწყისში გვქონდა. უნდა დავიცვათ ყველა რეკომენდაცია, პირველ რიგში, ვატაროთ პირბადე დახურულ სივრცეებში. ასევე შემოდის რეგულაცია პირბადის ღია სივრცეებში ტარებაზე იქ, სადაც ვიკრიბებით“, – განაცხადა ამირან გამყრელიძემ.

ამირან გამყრელიძემ საზოგადოებას დიდი თავყრილობისგან თავის არიდებაზეც კიდევ ერთხელ მოუწოდა.

ამასთან, დაავადებათა კონტროლის ეროვნული ცენტრის ხელმძღვანელის განცხადებით, პანდემიის დამარცხების გზაზე მთავარია ვაქცინაცია. გამყრელიძის თქმით, ქვეყანაში საკმარისი ვაქცინაა, ამიტომ მოქალაქეებმა ეს შესაძლებლობა უნდა გამოიყენონ და აიცრან.

„მთავარია, ყველანი წავიდეთ და ავიცრათ, ქვეყანაში არის საკმარისი ვაქცინა და კიდევ იქნება ვაქცინები, რომ დღეს თავისუფლად აიცრას 15- 20 ათასი ადამიანი. დღევანდელი ეპიდსიტუაციის გაუარესებას გააჩერებს ორი რამ – წესების დაცვა, თავი შევიკავოთ ქორწილებზე, ჭირის სუფრებზე, დიდ დაბადებისდ ღეებზე, დიდ კონცერტებზე მისვლისგან და ავიცრათ ყველა. ყველა მოვდუნდით, საზოგადოება მოდუნდა. უნდა ვიყოთ მეტად სოლიდარული, რადგან თუ ასე გაგრძელდა ეპიდვითარების გაუარესება, დაავადებათა კონტროლი შევა საბჭოში რეკომენდაციით, მეტი გამკაცრების მოთხოვნით. ჩვენ უკვე წითელ ხაზებს ვკვეთავთ, ყველაზე მძიმე 7 დღის განმავლობაში მაღალია სიკვდილიანობა. ამ კვირაში უკვე ხელი მოეწერება მინისტრის ბრძანებას და აცრის გაკეთება შესაძლებელი ექნება ყველას კოვიდის გადატანიდან 30 დღეში. სხვადასხვა ქვეყნებში სხვადასხვა დროა. ბავშვებში ინფიცირების მატებაა, თუმცა პროცენტული მაჩვენებლებით დიდი ნახტომი არ გვაქვს“, – განაცხადა ამირან გამყრელიძემ.

ამირან გამყრელიძემ ასევე აღნიშნა, საქართველოში ინდური შტამით ინფიცირებულია 30-40 პროცენტი და ვირუსის გავრცელების მაჩვენებელი ძალიან სწრაფად იზრდება.

„დელტა შტამით ინფიცირებულია 30-40% და ძალიან სწრაფად იზრდება“, – განაცხადა ამირან გამყრელიძემ.

1 tv.ge

მეტი

მსგავსი სიახლეები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Back to top button
Close