ყველას გაქვთ მოსაზრების გამოხატვის უფლება პირად სივრცეში, თუმცა არ უნდა დაგვავიწყდეს, რომ გვაქვს ძალიან დიდი პასუხისმგებლობა – კახა კალაძე სამგორის გამგებელის მიერ სოცქსელში გამოქვეყნებული სტატუსის შესახებ

თბილისის მერი კახა კალაძე გამოეხმაურა სამგორის რაიონის გამგებლის, კახა სამხარაძის Facebook-სტატუსს, რომელიც მან 20 ივნისს რუსთაველის გამზირზე შეკრებილ მოქალაქეებთან დაკავშირებით გამოაქვეყნა.

„მე გუშინ გავაკეთე განმარტება კახა სამხარაძის Facebook-სტატუსთან დაკავშირებით. ეს არის მისი პირადი სივრცე. ქვეყანაში სიტყვის და გამოხატვის თავისუფლება დაცულია. მე შეიძლება რაღაც არ მომეწონა, ვიღაცას მოეწონა, ვიღაც კიდევ უფრო მეტად გაბრაზდა, მაგრამ სიტყვის და გამოხატვის თავისუფლება პირად სივრცეში ხელშეუხებელია. თუმცა თხოვნა მექნება ჩემი გუნდის წევრების მიმართ, რომ გვახსოვდეს – ჩვენ გვაქვს ბევრად უფრო დიდი პასუხისმგებლობა. ყველას უნდა გვახსოვდეს, რომ მთავარი და უზენაესი არის ქვეყნის ინტერესები, ამიტომ უნდა ვიმოქმედოთ მხოლოდ ქვეყნის და ხალხის ინტერესებით. მე არ მინდა, ვინმემ იფიქროს, რომ დამრიგებლის როლში გამოვდივარ – ყველას გაქვთ მოსაზრების გამოხატვის უფლება პირად სივრცეში, თუმცა არ უნდა დაგვავიწყდეს, რომ გვაქვს ძალიან დიდი პასუხისმგებლობა“, – განაცხადა კალაძემ.