როგორ გავცვალოთ 1 დოლარიანი თმის სარჭი ორსართულიან სახლში? – 29 წლის გოგონს თამამი ექსპერიმენტი
2005 წელს ერთ-ერთმა კანადელმა ბლოგერმა მთელ მსოფლიოში გაითქვა სახელი იმით, რომ ჩვეულებრივი, თმის სარჭი ორსართულიან სახლში 14 მარტივი ოპერაციით გადაცვალა. ექსპერიმენტის არსი იაფფასიანი ნივთის შედარებით ძვირადღირებულ ნივთში გადაცვლაში მდგომარეობს. ბარტერული გაცვლა-გამოცვლა მანამდე გრძელდება, სანამ სასურველ ნივთს არ მიიღებთ.
ახლახან კანადელი ბლოგერის „გმირობის“ გამეორება 29 წლის სან-ფრანცისკოელმა დემი შკიპერმა გადაწყვიტა. დემიმ მაისის თვეში, უბრალო თმის სარჭით დაიწყო და თავისი პირველი „ლოტი“გასაცვლელად ინტერნეტში განათავსა.
პირველი გარიგების შედეგად, გოგონამ თმის სარჭი საყურეებში გადაცვალა, საყურეები – კოქტეილის ჭიქების ნაკრებში, ნაკრები – მტვერსასრუტში. შეიძლება ვიღაცამ ასეთი გაცვლა არათანაბრად მიიჩნიოს, თუმცა დემის მტვერსასრუტს ერთი ნაკლი აქვს – ეს მოდელი არასწორი გამოყენების შემთხვევაში შეიძლება აალდეს. შესაძლოა, მტვერსასრუტის პატრონმა ნივთის თავიდან მოცილება ამიტომ იჩქარა ან უბრალოდ, სახლის დალაგებას კოქტეილის სმა ურჩევნია.
დემის მორიგი სვლა მტვერსასრუტის სნოუბროდრში გადაცვლა იყო (ფასი 95$), რასაც მოჰყვა 180 დოლარიანი Apple TV, ყურსასმენები, ორპულტიანი სათამაშო კომპიუტერი, 2011 წლის მაკბუკი, Canon-ის კამერა, სამი წყვილი სპორტული ფეხსაცმელი, iPhone 11 Pro Max, მეორადი ავტომობილი Dodge Caravan.
ავტომობილი სასწრაფოდ გადაცვალა ძვირადღირებულ სკეიდბორდზე Boosted Board V3 Plus. ამას მოჰყვა 2017 წლის მაკბუკი (ფასი 1400$) ეს ჯერჯერობით, მისი ბოლო გარიგებაა, თუმცა დემი გაჩერებას არ აპირებს. მისი საბოლოო მიზანი ორსართულიანი სახლის გასაღებია.
