პარტია „ქართული ოცნების“ თავმჯდომარის ირაკლი კობახიძის განცხადებით, კოალიციურ პარტნიორობა „ნაციოანალურ მოძრაობასთან“ გამორიცხულია.
მისივე თქმით, ასევე გამორიცხულია პარტნიორობა გიორგი გახარიას პარტიასთან.
„რაც შეეხება პოტენციურ კოალიციურ პარტნიორობას კონკრეტულ პარტიებთან, „ნაციოანალურ მოძრაობასთან“ ეს ჩვენთვის აბსოლუტურად გამორიცხულია. დარწმუნებული ვართ, რომ ის ღირებულებითი შეუთავსებლობა, რაც ჩვენ გვაქვს ამ პარტიასთან, მომავალშიც არ აღმოიფხვრება. ისინი ვერ შეიცვლებიან, ეს საზოგადოებამაც ძალიან კარგად იცის.
რაც შეეხება გახარიას, პირდაპირ გეტყვით, რომ პოლიტიკაში თუ ზოგადად პრაქტიკაში არსებობს მაგალითები, როდესაც მტერთანაც გარიგდებიან ხოლმე. პოლიტიკაში ხდება ასეთი რამ, მაგრამ არავინ არ რიგდება მოღალატესთან. აქედან გამომდინარე, გამორიცხულია. თუ ქვეყანას სჭირდება, შესაძლოა, მტერსაც გაურიგდე, მაგრამ მოღალატეს – ვერა.
გახარიასთან დაკავშირებით თავიდან იყო გარკვეული გაუგებრობა, გარკვეული ეჭვები არსებობდა, ხომ არ იყო ჩვენთან რაიმე ფორმით გარიგებული ეს კაცი. თუმცა, დღეს მგონი, მთელი საზოგადოება დარწმუნდა, თუ რა არის ჩვენი დამოკიდებულება. კიდევ ერთხელ ცალსახად შეგვიძლია ვთქვათ, რომ როდესაც ადამიანი სჩადის ღალატს, მასთან რაიმე ტიპის გარიგებაში შესვლა არის გამორიცხული და ამას საზოგადოება ხედავს“, – განაცხადა ირაკლი კობახიძემ.
