პოლიტიკა

„თუ ნეიტრალური ტელევიზია შექმნის შესაბამის პლატფორმას, მზად ვარ, 16-ვე კანდიდატთან დავჯდე დებატებში“ – კახა კალაძე

რა თქმა უნდა, არ ვაპირებ ასეთ ტელევიზიებში მისვლას, რომელთა ჟურნალისტები დაკავებულები არიან ჩემი დისკრედიტაციით, ცილისწამებით და ტალახის სროლით – „ქართული ოცნების“ თბილისის მერობის კანდიდატმა კახა კალაძემ კონკრეტულ ტელევიზიებში წინასაარჩევნო დებატებში მონაწილეობაზე უარის მიზეზი კიდევ ერთხელ განმარტა.

„ცალსახად მინდა ხაზი გავუსვა, რომ მე დებატებზე უარი არ მითქვამს. არის საზოგადოებრივი მაუწყებელი, რომელსაც კანონი ავალდებულებს დებატების გამართვას. თუ ისინი შექმნიან შესაბამის პლატფორმას, მე, კახა კალაძე, თბილისის მოქმედი მერი და მერობის კანდიდატი მზად ვარ, 16-ვე კანდიდატს დავუჯდე დებატებში. ყველა ჩემს ოპონენტს დიდ პატივს ვცემ, არავის გამოვარჩევ, არაფრით განსხვავდებიან ერთმანეთისგან და ჩემი მხრიდან არ იქნება სწორი, დიფერენცირება გავაკეთო. მზად ვარ ყველას დავუჯდე დებატებში. ამ არხების მხრიდან გაკეთებული განცხადება არ მივიღე და ამას აქვს თავისი ახსნა: შეგიძლიათ, ნახოთ კონკრეტული გადაცემები ჩემთან დაკავშირებით, ცილისწამება, შეურაცხმყოფელი განცხადებები, ტალახის სროლა. მხოლოდ ჩემზე კი არ გაჩერდნენ, უკვე ოჯახის წევრებზეც გადავიდნენ, ჩემს მეუღლეზე. საუბარი იყო, თითქოს „თბილსერვის ჯგუფის“ თანამშრომლების ტანსაცმელს ჩემი მეუღლე კერავს. ბევრი ტყუილი და სიბინძურე მოვისმინეთ ბოლო თვეების განმავლობაში, განსაკუთრებით, რაც ეს საარჩევნო კამპანია დაიწყო. რა თქმა უნდა, არ ვაპირებ ასეთ ტელევიზიებში მისვლას, რომელთა ჟურნალისტები დაკავებულები არიან ჩემი დისკრედიტაციით, ცილისწამებით და ტალახის სროლით. შესაბამისად, ნეიტრალური ტელევიზია, როგორიცაა საზოგადოებრივი მაუწყებელი, თუ შექმნის შესაბამის პლატფორმას, მზად ვარ, 16-ვე კანდიდატთან დავჯდე დებატებში“, – განაცხადა კახა კალაძემ.

მისივე თქმით, ე.წ. კრიტიკული მედიის მხრიდან გავრცელებული ცილისწამება და ტყუილები საზოგადოებაზე ნეგატიურად აისახება.

„როდესაც მოდიოდა ამდენი ნეგატივი ჩემი მისამართით ამ ტელევიზიების მხრიდან, მე ყოველთვის ხაზს ვუსვამდი, რომ რაღაცაზე მაღლა უნდა დავდგეთ, შეუძლებელია ამდენი შეურაცხყოფა, ამდენი სიძულვილი. ეს ყველაფერი აისახება საზოგადოებაზე და ამ ყველაფრისგან ვიღებთ ძალიან მძიმე შედეგებს. ყველა, არ აქვს მნიშვნელობა, ხელისუფლების წარმომადგენელი იქნება თუ ოპოზიციის, საზოგადოების ჩართულობით, რაღაცაზე თუ არ შევთანხმდით, ასე გაგრძელება წარმოუდგენელი და შეუძლებელი მგონი ჩვენი ქვეყნის განვითარებისთვის, მომავალი თაობებისთვის, ჩვენი შვილებისთვის. ის, რაც ხდება ამ ტელევიზიებში, პირდაპირ დედის გინება რომ არის, ხან ჭიქებს ესვრიან ერთმანეთს და ხან ბოთლებს, ამას ხომ ახალგაზრდები უყურებენ და ძალიან ცუდად აისახება მომავალ თაობაზე, შემდეგ კი საზოგადოებაში ძალიან ცუდი სახით იჩენს თავს. ამიტომ ყველა რაღაცაზე უნდა შევთანხმდეთ, რაღაც წითელი ხაზები უნდა გაევლოს. პოლიტიკასაც თავისი წესები აქვს, ეს არ არის ბრძოლა წესების გარეშე“, – აღნიშნა კახა კალაძემ.

მეტი

მსგავსი სიახლეები

კომენტარის დატოვება

თქვენი ელფოსტის მისამართი გამოქვეყნებული არ იყო. აუცილებელი ველები მონიშნულია *

Back to top button
Close