„თებერვლიდან უნდა გაიხსნას რესტორნები, კაფეები, კომენდანტის საათიც მოიხსნება. ქორწილებსა და ქელეხებზე შეზღუდვებიც შემსუბუქდება“ – ლადო კახაძე
იანვრის ბოლოს ხელისუფლება კორონავირუსთან დაკავშირებული მთელი რიგი რეგულაციების მოხსნას გეგმავს. სავარაუდოდ თებერვლიდან გაიხსნება რესტორნები და კაფე-ბარები. ასევე, მუშაობას განაახლებენ ბაზრობები, მოიხსნება კომენდანტის საათიც. ეტაპობრივად მოიხსნება შეზღუდვა ტრანსპორტზე. შემსუბუქდება ქორწილებსა და ქელეხებზე დაწესებული შეზღუდვები.
როგორც ჯანმრთელობის დაცვისა და სოციალურ საკითხთა კომიტეტის თავმჯდომარის პირველმა მოადგილემ ლადო კახაძემ „პრაიმტაიმთან“ საუბრისას განაცხადა, ტრანსპორტში ადამიანების რაოდენობა მკაცრად გაკონტროლდება.
„იანვრის ბოლოდან მოლები, ბაზრობები, მაღაზიები გაიხსნება. რამდენადაც ვიცი, კომენდანტის საათიც მოიხსნება. რაც შეეხება ტრანსპორტს, იგეგმება მისი რეგულარული ამუშავება, ტრანსპორტში იქნება “რეგულატორი”, რომელიც მგზავრთა რაოდენობას გააკონტროლებს, რათა ტრანსპორტი გადავსებული არ იყოს.
პირველი თებერვლიდან უნდა გაიხსნას რესტორნები, კაფეები და ბარები, თუმცა იქნება დაცული დისტანცია და შეიზღუდება იქ მიმსვლელთა რაოდენობა. ქორწილებსა და ქელეხებს რაც შეეხება, შესაძლოა, ამ შეზღუდვის შემსუბუქებაც მოხდეს”, – განაცხადა კახაძემ.
