დაავადებათა კონტროლის ცენტრის თანამშრომელი ლიანა ნებაძე კოვიდ 19-ით გარდაიცვალა
დაავადებათა კონტროლის ეროვნული ცენტრის სამცხე-ჯავახეთის განყოფილების თანამშრომელი კოვიდ 19-ით გამოწვეული გართულებებით გარდაიცვალა. ლიანა ნებაძე მობილური ამცრელი ბრიგადის წევრი იყო, რომელიც იმუნიზაციას კარდაკარ ახორციელებდა.
სამხრეთის კარიბჭის ცნობით, ლიანა ნებაძე ცენტრის სამცხე-ჯავახეთის განყოფილებაში 2012 წლიდან მუშაობდა.
„კოვიდ 19-ით დაინფიცირდა და ინფექციით გამოწვეული გართულებებით გარდაიცვალა მაღალი დონის პროფესიონალი, საუკეთესო ადამიანი… მას უზარმაზარი წვლილი აქვს შეტანილი სამცხე-ჯავახეთის რეგიონში იმუნიზაციის პროგრამის წარმატებით განხორციელებაში. იყო მობილური ამცრელი ბრიგადის წევრი, რომელიც კარდაკარ სოფელ-სოფელ ახორციელებდა იმუნიზაციას. ლია გამოირჩეოდა მაღალკვალიფიციური საქმიანობით, შრომისმოყვარეობით და საქმისადმი კეთილსინდისიერი დამოკიდებულებით. მონაწილეობა აქვს მიღებული არაერთ ეპიდაფეთქების ლიკვიდაციაში“, – ნათქვამია განცხადებაში.
