აშშ სამოგზაურო შეზღუდვების მოხსნას ამ ეტაპზე არ გეგმავს
ამერიკის შეერთებული შტატები არსებული სამოგზაურო შეზღუდვების მოხსნას ამ ეტაპზე არ აპირებს, – შესაბამისი განცხადება თეთრ სახლში გაკეთდა. ინფორმაციას „როიტერი“ ავრცელებს.
„იმ რეალობის გათვალისწინებით, რაც დელტა ვარიანტის გავრცელების გამო არსებობს, სამოგზაურო შეზღუდვებს ძალაში ვტოვებთ. ვირუსის ახალი ვარიანტის შემთხვევები ბოლო რამდენიმე კვირაა, იზრდება, განსაკუთრებით იმ ადამიანებში, რომლებსაც ვაქცინა გაკეთებული არ აქვთ“, – განაცხადა თეთრი სახლის პრესმდივანმა ჯენ ფსაკიმ.
დღეს შტატებში შესვლა ეკრძალება ამერიკის არამოქალაქეთა უმეტეს ნაწილს, ვინც ბოლო 2 კვირის მანძილზე იმყოფებოდა გაერთიანებულ სამეფოში, შენგენის ზონის 26 ქვეყანაში, ირლანდიაში, ჩინეთში, ინდოეთში, სამხრეთ აფრიკაში, ირანში და ბრაზილიაში.
2020 წლის იანვარში, კოვიდ-19-ის გავრცელების პრევენციის მიზნით, მოგზაურობაზე შეზღუდვა პირველად ჩინეთს დაუწესდა. ვაშინგტონმა შემდეგ სია გაზარდა და მასში სხვა ქვეყნებიც შეიყვანა. ყველაზე ბოლოს სიას ამ წლის მაისში ინდოეთი დაემატა. გასულ კვირას გაირკვა, რომ ამერიკა სახმელეთო საზღვარს კვლავ ჩაკეტილს დატოვებს ორივე მოსაზღვრე სახელმწიფოსთან, კანადასთან და მექსიკასთან.
