მილიონები სკანდალური მოგონებებისთვის – პრინცი ჰარი წიგნის გამოსაცემად ემზადება

სასექსის ჰერცოგს სკანდალური მემუარების წიგნში, რომელიც გამომცემლობა Penguin Random House- მა დაბეჭდა, ათობით მილიონ დოლარს გადაუხდიან. ამის შესახებ Page Six იუწყება.

გამოცემის ინფორმაციით, ჰარიმ მემუარებისთვის ავანსის სახით 20 მილიონი დოლარი უკვე მიიღო. Page Six აცხადებს, რომ პრინცი წიგნზე ერთი წლის განმავლობაში, ფარულად მუშაობდა. მისი თანაავტორი ჟურნალისტი და პულიცერის პრემიის ლაურეატი ჯონ მერინგერი გახდა, რომელიც, გაცილებით მოკრძალებულ ავანსს – ერთ მილიონ დოლარს დასჯერდა.

19 ივლისს, პრინცმა ჰარიმ განაცხადა, რომ წიგნიდან მიღებულ მთელ შემოსავალს საქველმოქმედო ორგანიზაციას გადასცემს, მაგრამ არ დააკონკრეტა, შედის თუ არა ამ თანხაში ავანსი.

”ჰარი, რომელმაც პრინცის გამოცდილება სოციალური თავისუფლებისთვის ბრძოლისთვის გამოიყენა, გამბედაობისა და გახსნილობის წყალობით, ერთ -ერთი ყველაზე თვალსაჩინო ლიდერად იქცა.  ჩვენ სიამოვნებით გამოვაქვეყნებთ მის გულახდილ და შთამაგონებელ ისტორიას, ”- განაცხადა გამომცემლობა Penguin Random House- ის აღმასრულებელმა დირექტორმა მარკუს დოჰელმა.

გავრცელებული ინფორმაციით, წიგნზე მუშაობა ჯერ არ დასრულებულა. მემუარების გამოქვეყნების სავარაუდო თარიღი 2022 წლის ბოლოა. ნაბეჭდი ვერსიის გარდა, გამოვა აუდიო ვერსიაც.

ცნობისთვის, დოკუმენტურ ფილმში „ჩემი უხილავი მხარე“ ჰარიმ გაიხსენა, რომ დედის გარდაცვალების შემდეგ ნათესავების დახმარებას ამაოდ ელოდა. ისინი ფიქრობდნენ, რომ ჰარი დამოუკიდებლად უნდა გამკლავებოდა საკუთარ განცდებს და პრესის ზეწოლას. პრინცმა აღიარა, რომ ამ პერიოდში ალკოჰოლური სასმელების გარეშე ვერ ძლებდა და ხშირად პანიკური შეტევები ჰქონდა.